ОФФЕСТ 2022: “Перија” ја оправдаа честа, Добрила растопи, вечерва Балаке Сисоко и Лукас Сантана!

24
smart

Скопје, 2 јуни 2022

По синоќешното волшебно отворање на 21. издание на OFFest (1-4 јуни), со извонредните настапи на домашните Perija и Dobrila & Dorian Duo, нашиот најголем и најзначаен фестивал на музика на светот продолжува натаму.
“Перија”, младиот и претежно женски состав, сосема ја оправдаа честа и ги заслужија сите аплаузи на отворањето на фестивалот. Кои се нашите “Перија” и колку можат, се уверивме синоќа- извонредни музичарки и еден музичар, кои опуштено воедно и “сериозно” изведуваат свој концепт на неколку јазици, македонски, грчки, албански, турски, ромски, српски, и тоа социјално ангажирани музички теми, за дискриминација, за погледот на животот и смртта, за најстариот занает на светот, на човекот кој решил да се откаже од алкохол, но… , за луѓето во депресија кои посегнале по себе, како и на оние кои не се со нас, а на кои им посветија песни.
Ова е накусо, ви ја фрламе “јадицата” да се заинтересирате за овие концептуални музички таленти, да ги набавите нивните два возбудливи албуми и во иднина да посетите нивни настап, вредат и сигурни сме ќе траат…
Добрила растопи со својот фантастичен топол вокал, и интерпретации со многу спонтаност, мајсторија а без дополнителни трикови… Сѐ, чисто како солза.
Едноставно, прифатливо, фино… овој ултра модерен етно вокал, гордост на македонската сцена, во дует со Доријан ја исполни онаа задача која и впрочем ја очекувавме од неа- да биде едноставно совршена зад микрофонот ….
“Апокриф”, нивни албум кој пленува, но и нешто ново неслушнато, ѝ дадоа печат на нивниот настап.
***
Втората вечер на OFFest 2022 е резервирана за мајсторството во изведбата на африканската кора што ќе го сподели виртуозниот инструменталист BALLAKE SISSOKO од Мали, како и за рафинираниот пост-тропикализмичен и боса-нова звук на триото на бразилскиот гитарист, пејач, композитор и продуцент LUCAS SANTTANA. Тие вечерва, пред скопската публика, ќе ги претстават своите актуелни музички проекти на кои работеа последниве неколку години, но секако ќе се навратат и на најубавите мигови од нивниот огромен творечки опус.

Еден од најзначајните современи мајстори на инструментот кора, БАЛАКЕ СИСОКО е музичар од Мали, познат по своите инструментални иновации и бројни соработки вон западноафриканската музика. Меѓународниот подем го постигна заедно со кора гуруто Тумани Диабате, на албумот „New Ancient Strings“ (1999), првиот инструментален кора албум во светот. Сисоко започнал да се занимава со музика на млада возраст. Во 1981 година, уште во раните тинејџерски години, по смртта на татко му Џелимади, тој го зазема неговото место во Ensemble Instrumental National du Mali. Една од карактеристиките на неговата музичка визија е тоа што тој стана сериски кроскултурен соработник, секогаш подготвен да го имплементира звукот на кората во нови и различни контексти. Тоа започна со раскошен сет дуети на пијано и кора со италијанскиот композитор Лудовико Еинауди, а потоа следеше неговата соработка со ирскиот мултиинструменталист Рос Дејли. Настапувал или снимал музика со Рокиа Траоре, Таџ Махал, триото 3MA (со Ел Малуми и Раџери) и Салиф Кеита, меѓу другите. Веројатно најзабележителната негова авантура е тандемот со францускиот виолончелист Винсент Сегал, со кого сними два извонредни албуми на кора и виолончело дуети. Балаке е рангиран само позади неговиот роднина Тумани Диабате како најистакнат светски кора маестро.

Долго пред неговиот 30-ти роденден, бразилскиот вундеркинд ЛУКАС САНТАНА, крстосувајќи го светот со најголемите имиња на бразилската Тропикалија, веќе имаше апсорбирано огромно количество музика, недостижно за повеќето професионалци во текот целиот свој живот. Младиот талент од Баија беше откриен во своите рани дваесетти години од страна на бразилските „супертешкаши“ Жилберто Жил и Каетано Велосо. Во текот на својата повеќе од две децении долга кариера, тој издаде 8 одлични албуми, а компонираше музика и за неколку MPB ѕвезди, како Фернанда Абреу, Мариса Монте и Даниела Меркјури, прераснувајќи во еден од најжешките музички феномени јужно од Екваторот. Денес, пејачот, композиторот, продуцентот и движечката сила на бразилскиот нов бран се враќа кон корените на бразилската гитарска традиција од 1950-тите за да испорача еден пост-тропикализмичен електро-акустичен поп албум со теми што го третираат подемот на реакционерната политика и нејзиното опасно игнорирање на човековите права и животната средина. Сантана бира интимна поставка за својата потрага по светлина во овие мрачни времиња. Како што вели: „живееме во време во кое сите зборуваат гласно. Мислам дека дојде време за шепот во ушите на луѓето“.

facebook настан:
https://bit.ly/3zbbTLK

www.offest.com.mk

Фотографии од настанот може да се погледаат на официјалната фејсбук страница на Скопскиот џез фестивал.
Валентина Ѓоргиевска Парго

куларт.мкСодржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.