Сеќавање на нашиот Јово, авторот на стиховите на „Бисер балкански“

95

Да беше жив, вчера (29 април 2024 година), ќе наполнеше 81 година, текстописецот Јован Павловски, авторот на македонската фолк химна “Бисер балкански”.
Роден е во Охрид, живееше во Скопје. Почитуван еснаф човек, на директорски функции, секогаш подготвен на прекрасно дружење со секого и широк круг на пријатели, нарекуван нашиот Јово.
Своите родендени и особено имендени на Свети Јован кои се славеа по неколку денови во нивниот голем стан во Дебар маало, со гостопримливата сопруга Виолета (архитектка), беа доживувани и раскажувани како вистински фешти, затоа што срдечно пречекуваа по неколку десетици роднини и пријатели, познати личности, со богата трпеза и многу музика, пеење, гитари, дружба со часови.
Во пишувањето текстови го наследи ќерката Маја Павловска, која меѓудругото со своето перо потпиша и неколку врвни песни и хитови на Тоше Проески, Лидија Кочовска, Ана Костовска, Сандро Николовски, синот на Гоце Николовски, и други пејачи, а денес е и сценаристка, актерка, и планетарно призната ликовна и авангардна уметница која со синот Бобан живее и работи во Утрехт Холандија, додека синот на текстописецот Јован, скопјанецот Зоран Зозо Павловски, е познат музичар и гитарист и член на повеќе антологиски македонски рок групи, како “Парамециум” и други.
Јован Павловски е автор и на многу други познати песни, а најпознатата сѐ-пеаната „Бисер балкански“ е новосоздадена македонска народна песна во изведба на пејачот Гоце Николовски. Песната за првпат била испеана на „Фолк фест Валандово“ во 1990 година. Ја освоила првата награда. Текстот на песната е од Јован Павловски, музиката е на Хилми Билбил а аранжманот е на Томислав Таневски.
Уште по самата изведба на фестивалот песната стана голем хит и многу наскоро станува широко прифатена од македонскиот народ, и не поминува веселба, свеченост, концерт без да се испее од публиката.

куларт.мкСодржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.