Секој верник, човек посветен на Бога, покрај љубовта кон него посебно почитува некој Светец кој го чувствува близок, свој заштитник и чие име и дела за народот низ векови, ги слави. Многумина ја слават Преподобна Мајка Параскева-Света Петка Византиска, посебно во Македонија. Луѓето и се поклонуваат, се молат за нејзина милост и го слават нејзиното име.
Света Петка е родена во Епиват во 944 година, во богато и чесно семејство. По стапките на нејзиниот брат и таа се предава, уште како многу мала на Бога. Ослепува на својата 11-та година и пет години е слепа, се до еден ден кога Бог и ја враќа виделината. Кога останува сама без родителите, целиот имот го раздава на сиромашни и оди во Цариград во 963-та година, каде служи на Светата Христијанска црква пет години. Го прифаќа Божјиот повик и во 968 оди во Палестина на Ходочешниство. Го посетува Исусовиот гроб и заминува за Пустината каде останува скоро 40 години, сосема сама поминувајќи ги сите животни искушенија. Станува света за време на живот и кога го слушнала Гласот Божји, 1010-тата година се вратила во родниот Епиват. Таму уште две години им помагала на луѓето, за во 1012 година отиде пред лицето на Бога.
Судбина на Света Петка -Преподобна Мајка Параскева, како светица не завршува тука. Таа се до 1643-та година кога нејзините мошти се пренесени во Јаши-Романија, поминала многу пренесувања од Бугарија, Србија и била оскрвнавена од Турците па пренесена во Царград .
Моштите од Цариград биле пренесени во Јаши и таму се сеуште, положени во Светиот храм посветен на оваа моќна светица. И верувајте, кога ќе ги допрете нејзините раце, ќе почуствувате како сеуште да тече крв низ нејзиното тело,тие се едноставно топли. На овој начин, со помош на оние кои помош и сила бараат од неа, светицата Света Петка Преподобна Мајка Параскева сеуште живее.
Затоа нека е за многу години нејзиниот ден. На сите што го слават да им донесе мир, љубов и благосостојба во домот, на сите верници верба во добрината и љубовта а на сите луѓе спокој.
Татјана Гогоска
