Боби Андонов има нов сингл

11

Вчера 21.03.2024 година, на Јутуб беше промовиран најновиот сингл “Between the Lines“- прва песна од неговиот нов проект за која ќе рече:

“Беше патување од првото необично демо. Зборовите зад песната имаат неколку различни значења, малку е мистериозно, но за мене се работи за внатрешната борба, каде што си самиот свој најголем непријател”.

 

 

Албумот под наслов “SAINT” се очекува да излезе на 9. Maj.

 

Боби Андонов, да потсетиме, е македонски пејач, текстописец и продуцент, роден во Мелбурн Австралија, по потекло од Струмица, а живее и работи во Лос Анџелес (САД).

Македонската публика го памети по настапот на детската евровизија во далечната 2008 година во Кипар, каде на негови 14 години ја претставуваше Македонија. Во конкуренција од петнаесет земји Боби се пласираше на високото петто место со песната “Прати ми СМС“ во продукција на Јованов Рекордс.

 

 

Музичката кариера ја почнува на шест годишна возраст, ученик е по пеење, танц, пијано и гитара, а на девет години настапува во младинскиот мјузикл Брилијантин. Подоцна тој е избран да биде млад Симба во бродвејската продукција на “Кралот лав” во Мелбурн и Шангај, Кина.

 

За големината на неговиот талент и потенцијал доби потврда од нашиот најголем Тоше Проески, каде во септември 2007 година на австралиската турнеја на Тоше, во Мелбурн имаа заедничка изведба на песната “Life is a book”.

 

 

Во 2010 година учествува во шоуто “Astralia’s Got Talent” каде се пласира во големото финале, а со изведба на песната “Фајтер“ од Кристина Агилера завршува на петтото место.

 

 

Соработува со Warner Music, а во ноември 2015 година Андонов потпишува договор со Hollywood Records и се сели во Лос Анџелес, каде живее и работи денес.

Пред точно една година го објавува синглот “Bad Decisions“, кој се најде во хит филмот на Netflix “After Everything“ и котираше високо на топ листите низ цела Европа.

Горд на своето македонско потекло, пред една недела објавува верзија на Јовано Јованке, за која миксот и мастерингот го изработи нашиот познат продуцент Јован Јованов.

“Сакам да објавам нешто и за моите фанови од Македонија, како благодарност за сета љубов и поддршка што ми ја даваат за сите овие години”- изјавува Боби.

 

 

Боби Андонов во моментот во Лос Анџелес работи на нов албум и на проекти на други изведувачи, но има желба и се надева дека оваа година ќе ја посети Македонија.

https://www.instagram.com/bobiandonovofficial/

 

 

куларт.мкСодржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.